البيتزه وجمالها , اول تطبيق ليا بيتزا بحب بلدي المميزة
الطريقة لعمل البيتزا في المنزل مضمونه لكي تضمني الصحة لاولادك
يابنات النهاردة هاعملكم بيتزا ولا المطاعم بل تنافسها مش في الشكل
بس ولكن في الطعم كمان بجد نفس طعم عجينة بيتزا هت واجمل أنا
عندي الأولاد بيحبوا البيتزا اللي أنا بعملها اكتر من اللي بنشتريها من برة
وانا متأكدة اللي هتعملها تصدق كلامي اولاً العجينه اللي بستخدمها في
البيتزا هي عجينة حبيبة قلبي ام أنمار وسبق ونزلت موضوع عنها وللأسف
الصور اتمسحت وكتيير طلبوها مني ع الخاص وكمان طلبوا طريقة الصلصة
النهاردة ان شاء الله بحاول ألبي طلباتكوا كمان أنا أضفت للعجينه مكون
بسيط وهو دا سر المطاعم ها اقولكوا عليه ف المكونات مقادير العجينه 6
كوب دقيق علبة زبادي 2 كوب حليب سايل دافئ 5 معلقه كبيرة زيت زيتون
1/4 كوب سكر 2 م ك خميرة م ص بيكنج بودر رشة ملح والمكون البسيط
اللي أضفته هو 1/4 م ص ثوم بودر او ممكن تحطي 1/2 م ص صدقوني
بتطلع العجينه روووعه نفس المطاعم الطريقه نضع الحليب الدافئ والزيت
والزبادي في خلاط الطعام ثم نضيف له كوب دقيق والخميرة والسكر ونخلط
حوالي ثلاث دقائق ثم يصب الخليط في وعاء ويضاف لباقي كمية الدقيق بعد
ما أضفنا الدقيق البيكنج بودر والملح يعني مش بحط ب ب والملح في
الخلاط لا بخليه مع الدقيق ونعجن كويس جداً لو في واحدة فيكم مضايقه
من حاجه تحط همها في العجين والصراحه أنا بحب اعجنها علي الرخامه.
وبطريقة حورية المطبخ أكيد كلكوا عارفينها بطلع نتيجه هايله للمعجنات
وأكيد انتوا لاحظتوا دا في كل معجناتي ( ثقه هه) و التخمير العجينة بتختمر
علي طول جداً وعما العجينه تختمر نكون جهزنا الصلصه نقطع بصل ونشوحه
مع شوية زيت ثم نشوح معاه فلفل اخضر مقطع أنا بحب اشوحهم ع النار
شويه أحسن لانها بتدي طعم حلو ثم نضيف الطماطم المقطعه ونغطي
حوالي خمس دقائق لغاية ما كل حاجه تلين ثم نفرمها في المفرمه ونرجع
نحطها ع النار تاني ونضيف لها صلصة طماطم ومعلقة كاتشب وملح وفلفل
اسود وكسبرة ناشفه وشوية شطه للي يحب ومعلقه صغيرة سكر عشان
يدي توازن وماتكونش حامضه ونسيبها تتسبك ع النار لغاية ما تنشف من
المايه وتكون الصلصه متماسكه ومفيش فيها ولانقطة مايه والصور توضح
ملحوظه مهمه جداً جداً لازم ولابد الصلصة تكون باردة بمعني ممنوع نضعها
علي العجينه وهي ساخنه دا بيفسد العجينه ومش هاترتفع وتنفش
معاكي والسر دا أنا لاحظته من نفسي من خلال خبرتي في المطبخ يعني
أنا بجهز منها كميه وبحطها ف الفريزر ولما احب اعمل بيتزا بطلعها واخليها
تفك او احطها فك الميكرويف يارب تكون النقطه دي وضحت نيجي لتشكيل
البيتزا نقطع العجينه كور كبيرة ع حسب حجم الصينيه وبفردها الاول
بالنشابه وبعدين احطها في صينيه مدهونه وافردها كويس وأحاول اعمل لها
جوانب يعني تكون الأطراف مرتفعه شويه عن الوسط ثم نضع الصلصه تابعوا
معي باقي الموضوع لانه طويل شويه سوف اشرح كل نوع بالتفصيل بإذن
الله رجاءً عدم الرد
أنا قطعت كور صغيرة من العجين وحشيت كل قطعه نقانق وحطيتها ع
الأطراف وبعد ما حطينا الصوص ترش عليه جبن موزاريلا وساعات بعمل
خليط من الموزاريلا والشيدر والقشقوان وهنا حبيت أغير في الشكل
وعملتها كب بيتزا ودي البيتزا التقليديه وأضفت ع الوجه شرايح رفيعه جداً
من الفلفل الاخضر والبصل وزيتون حلقات وسوسيس ونوع تاني حطيت عليه
بيبروني ثم تخبز في فرن حامي واليكم النتيجة النهائيه اه نسيت اقولكوا
بعد ماتستوي ف الفرن بضيف لها جبن موتزاريلا ويادوب بس تسيح من
حرارة الفرن بطلعها ودي كب بيتزا كيوت وحلوة للأولاد ممكن ياخدوها
معاهم المدرسه يتبع ارجو عدم الرد
شوفوا الجبنه اذاي بتمط يمي لذيذة وعلي فكرة حلاوة البيتزا انك تاكليها
ساخنه شوفوا تحميرها من الخلف احلي من بره شوفوا م الداخل هشه
ولذيذة ع فكرة أنا بحب اكل الأطراف وكمان الصلصه حلوة جداً مع المكرونات
وف الختام أتمني اكون وفقت في طرح هذا الموضوع لأني تعبت فيه جداً
في المطبخ عايزة اقول ان أنا عملت البيتزا دي مخصوص عشانكوا والأولاد
عرفوا لما شافوني قالوا أكيد البيتزا دي ياماما مش لينا دعواتكوا في أمان
الله والحمد لله الذي أطعمنا وسقانا وكفانا فكم ممن لا كافي له ولا مأوي
اول تطبيق ليا بيتزا بحب بلدي المميزة
اول تطبيق ليا بيتزا بحب بلدي المميزة
